“Ашмянская вандроўка”
Ашмяншчына – цудоўны і непаўторны край, багаты гістарычным і археалагічным мінулым, край, які памятае многіх знакамітых асоб. Іменна гэта і падштурхнула вучняў 5-ых класаў нашай школы адправіцца на экскурсію ў Ашмянскі краязнаўчы музей імя Францішка Багушэвіча.
Ашмянскі краязнаўчы музей імя Ф.К.Багушэвіча заснаваны 27.09.1952 г. Музей захоўвае прадметы археалогіі і нумізматыкі, асабістыя рэчы ашмянцаў і прадметы народнага побыту, вырабы майстроў-умельцаў і дакументы, зброю і фатаграфіі, чучалы і муляжы, кнігі і іншыя рэчы.
Пра багаты і разнастайны свет прыроды Ашмянскага раёна даведаліся вучні ў зале “Свет прыроды”. Легенду аб узнікненні Ашмян пачулі ў зале “Ашмяны ад старажытнасці да XXI стагоддзя”.
Здзейснілі віртуальнае падарожжа па славутых мястэчках Ашмянскага раёна: Мураваная Ашмянка, Баруны, Гальшаны і Жупраны ў зале “Славутыя мясціны Ашмяншчыны”.
Падарожжа па Ашмяншчыне перарываецца цёмна-шэрай паласой вайны. Пра боль трагедыі і радасць Перамогі мы даведаліся ў зале «Старонкі гісторыі краю ў ХХ ст.» Лагічнае завяршэнне гэтай залы - мемарыяльны куток Францішка Багушэвіча.
Мы ўпэўніліся: Ашмянскі край мае багатую гістарычную спадчыну.
