Дзень Перамогі. Мы памятаем!
Дзень Перамогі з'яўляецца для нас усіх асаблівым святам, у якім зліліся і радасць перамог, і горыч страт.
8 мая ля брацкай магілы савецкіх ваеннапалонных у пасёлку Гудагай адбыўся мітынг, прысвечаны 75-й гадавіне Перамогі ў Вялікай Айчыннай вайне. Актыўныя ўдзельнікі мітынгу - навучэнцы 11 ваенна-патрыятычнага класа і 9 прававога класаў Гудагайскай сярэдняй школы. Рабяты казалі словы падзякі тым, хто змагаўся за Радзіму і перамог. З прывітальным словам і віншаваннем звярнуўся да прысутных Трошка Максім Сяргеевіч, камендант пагранкамендатуры «Гудагай». Удзельнікі мітынгу ўшанавалі хвілінай маўчання памяць загінулых у гады вайны, затым адбылося ўскладанне вянкоў, кветак і гірлянды да помніка, як даніна памяці тым, дзякуючы каму стаў магчымым Дзень Перамогі. У выкананні аркестра Смаргонскай пагранічнай групы прагучалі мелодыі ваенных гадоў.
